Friday, January 29, 2010

बादली



भातो लेकर मै चलीजी ढोला,
                             कोई घिर आई घटा घनघोर जी,                                 
                                बरसण लागी भंवरजी बादली  जी |                                    
                           
रपट पड़ी मै फिसल पड़ी जी ढोला ,
  कोई बिजली चमके जोर जी ,
  बरसण लागी भंवरजी बादली  जी  |          
                                                             
 बिरखा माँई भीजगी जी ढोला,      
                                      मिल्यो न थारो खेत जी,                                 
                              बरसण लागी भंवरजी बादली जी।                                       

 ऊँचे मंगरे चढ़ देखती गौरी,
    दीखता अलबेला छैल जी,
बरसण लागी भंवरजी बादली जी।        


तीन कोस ढोला चल के आई ,
   कोई काँटा गडग्या चार जी,
बरसण लागी भंवरजी बादली जी.       

पगल्या तो राखो गौरी  म्हारी  गोद में ,         
   काँटा तो  काढां  थारा चार जी,   
बरसण लागी भंवरजी बादली जी।     


      कांई तो बीज्यो आंथुनां खेत मे  जी ढोला,                    
  कांई तो बीज्यो ऊँचा मगरा  मांय जी,       
बरसण लागी भंवरजी बादली जी। 

           आंथूना  खेतां मे  बीजी  बाजरी गौरी,           
         ऊँचा मगर में   बोई    मै ज्वार जी,       
   बरसण लागी भंवरजी बादली जी। 




फरीदाबाद
२९ जनवरी २०१०

(यह कविता "कुमकुम के छींटे" नामक पुस्तक में प्रकाशित है )

No comments:

Post a Comment